XOG: Wasiir Dubbe oo safar qarsoodi ah dalka uga baxay

Warar lagu kalsoonaan oo aan helnay ayaa sheegaya in Wasiirka Warfaafinta Xukuumadda xilgaarsiinta Cismaan Abuukar Dubbe uu safar qarsoodi ahaa ku aaday Magaalada London ee Caasimadda dalka Ingiiriiska.

Xubno ka tirsan Wasaaradda Warfaafinta oo la hadlay Dalsan ayaa xaqiijiyay in Wasiir Dubbe uu qaatay fasax gaaban, isla markaana uu ku doonayo in Ehelkiisa oo ka degan London uu lasoo Ciiddo.

Socdaalka Dubbe ayaa kusoo aaday, xili dalka uu galay Isbedel siyaasadeed oo weyn, kadib markii Maanta Madaxweynaha muddo xileedkiisa dhammaaday Farmaajo uu Arrimaha doorashada iyo amniga ku wareejiyay Ra’iisu Wasaare Maxamed Rooble.

Wasiirka Warfaafinta Xukuumadda xilgaarsiinta Cismaan Abuukar Maxamed Dubbe ayaa la rumeysan yahay inuu ahaa Wasiirka kaliya ee difaacayay siyaasadda Dowladda Federaalka gaar ahaan muddo kordhintii la sameeyay, balse Maanta Golaha Shacabka ay dib uga laabteen, dibna u soo celiyay heshiiskii 17-kii September.