Taabid Cabdi Oo Ka Hadlay Go’aankii Lagu Ansixiyay Metelaadda G/Banaadir

Guddoomiyihii hore ee Gobolka Banaadir ahaana Duqii Magaalada Muqdisho Taabid Cabdi Maxamed ayaa ka hadlay Go’aankii Xildhibaanada Golaha Shacabka Baarlamaanka ay ku ansixiyeen xeerka Metelaadda Gobolka Banaadir ee Aqalka Sare ee Dalka.

Taabid Cabdi oo qoraal soo saaray ayaa waxaa uu kusoo dhaweeyay ansixinta xeerka Metelaadda Gobolka ee Aqalka Sare looga siiyay 13-xubnood, wuxuuna arrintaas ku tilmaamay tallaabo wanaagsan oo hore loo qaaday.

Xildhibaanada Golaha Shacabka ayuu Taabid Cabdi uga mahadceliyay Go’aankii ay ku ansixiyeen xeerka, isagoo sheegay in Shacabka ku dhaqan Magaalada Muqdisho loo rumeeyay qeyb ka mid ah rajadii ay qabeen.

Guddoomiyihii hore ee Gobolka Banaadir ayaa waxaa uu tilmaamay in shacabka Muqdisho looga baahan inay u wada istaagaan sidii loo rumeyn lahaa riyada dhiman ee ah helidda maamul deegaan oo madaxbanaan kana shaqeeya baahiyaha amni, waxbarasho iyo caafimaad.

Hoos ka Akhriso Qoraalka uu soo saaray Taabid Cabdi.

Waxaa rumoobay qeyb ka mid ah riyadii Muqdishaawiyiinta oo mudo duudsaneyd taasoo ah matalaadda Aqalka Sare ee G/Benaadir. Waa tallaabo wanaagsan oo hore loo qaaday.

Waxaan u mahadcelinayaa dhammaan intii ka qeyb qaadatay rumeynta sadka xaqa ah ee G/Benaadir uu maanta helay.

Laga bilaabo maanta Muqdishaawiyiinta waxaa hortaalla in ay u wada istaagaan sidii loo rumeyn lahaa riyada dhiman ee ah helidda maamul deegaan oo madaxbanaan kana shaqeeya baahiyaha amni, waxbarasho, caafimaad & maamul iskufilan oo dadka G/Benadir sitoos ah ugu adeega.

Soomaaliya maadaama ay qaadatay hannaanka Federaalka, Maamul madaxbanaan in uu yeesho G/Benaadir waa mid dastuuri ah, hadii federaalku run naga yahay.

Waxaa xusid mudan in Guddigii Dib-u-Eegista Dastuurka ee Barlamaankii 9aad ay isku raaceen in nooca maamul ee Benaadir/Muqdisho ay yeelan doonto uu noqdo Gobol Madaxbanaan oo isla markaana ah Caasimadda Dalka (City State), sida magaalada Berlin ee dalka Jarmalka oo federaal ah, waana nooca maamul ee uu mudan yahay G/Benadir.