Wararkii ugu danbeeyay khasaaraha ka dhashay Qarax Ciidamada DF lagula eegtay duleedka Muqdisho

Warar dheeraad ah ayaa waxay ka soo baxayaan Qarax khasaaro geystay kaasi oo ka dhacay meel ku dhow deegaanka Garasbaaleey ee duleedka magaalada Muqdisho.

Qaraxa ayaa lala eegtay gaari ay saarnaayeen ciidamo ka tirsan kuwa Dowladda Federaalka Soomaaliya oo marayay deegaankaasi.

Qaraxaani ayaa waxa uu ahaa Miinada wadooyinka hareeraheeda lagu aaso waxaana uu qabsaday gaari ay wateyn qaar kamid ah ciidamada dowladda, waxaana ku geeriyooday ilaa saddex askari oo saarnaa gaarigaasi qaraxa lala eegtay, waxaana ku dhaawacmay labba ruux oo shacab ah.

Warar aanay heleyno ayaa sheegaya in Askarta geeriyootay meydkooda loo soo qaaday magaalada Muqdisho, iyada oo dadka dhaawacmay la dhigay isbitaal ku yaalla Deegaanka Garasbaaley.

Shabaab ayaa kordhiyay qaraxyada ay ku aasaan wadooyinka hareerahooda oo ay ku beegsadaan ciidamada iyo shaqaalaha dowladda Federaalka Soomaaliya.