(Warbixin) Xiisadda Galmudug Oo Maalinba Maalinta Ka Dambeysa Sii Cakirmeysa

Waxaa Maalinba Maalinta ka dambeysa sii xoogeysaneysa Xiisada u dhaxeysa Madaxda Galmudug kadib markii xildhibaanadii Federaalka ee Cadaado tegay ay ku guuleysan waayeen xalinta xiisadaas.

Shalay Gelinkii dambe kulan ay yeesheen xildhibaanada taageersan Madaxweyne ku xigeenka iyo gudoomiyaha Baarlamaanka waxa ay Magacabeen Guddiga doorashada Madaxweynaha Galmudug kaas oo ka kooban 13 xubnood iyaga oo sidoo kale sheegay in ay xilkii ka qaadeen Xareed Cali Xareed Gudoomiye ku xigeenka Koowaad ee Barlamaanka Galmudug.

Xildhibaan Garaad Yuusuf oo ka mid ah xildhibaanada Galmudug ayaa sheegay in Guddigii ay Magacaabeen uu yahay mid Sharci ah isla markaana ay dhawaan Shaqadooda bilaabi doonaan.

Dhanka kale xalay waxaa sidoo kale kulmay Xildhibaanada kale ee taagersan Madaxweyne Xaaf kuwaas oo iyana sheegay in ay xilka ka qaadeen Madaxweyne ku xigeenka iyo gudoomiyaha Baarlamaanka isla markaana ay dhawaan Magacaabi doonaan Guddiga doorashada.

Xildhibaan Caasho Beyraq oo ka mid ah xildhibaanada Galmudug ayaa iyana waxa ay sheegtay in mooshin laga keenay labada Masuul ay soo dedejisay xilka qaadista iyo Xiisada Galmudug oo cirka iskusii shareertay.

Waxa kaloo ay sheegtay in kuwii ku shiray Cadaado aysan aheyn xildhibaano balse ay yihiin kuwa sii hurinaya xiisada Galmudug.

W/D:- Cabduqaadir Jakaarta